KOMUNIKADO DI PRENSA
No. 2017/015
Selikor NV
Fecha: 18 di òktober 2017
Tópiko: Selikor ta optené sertifikashon ISO 9000-2015 i 14001-2015
Telefon: 434-1349/Faks: 465-6964
wèpsait: www.selikor.com
Selikor ta optené sertifikashon ISO 9000-2015 i 14001-2015
Pa di 17 aña konsekutivo Selikor ta pasa dor di un ouditoria di ISO i ta finalisá esaki di forma eksitoso. Durante 16 pa 18 di òktober, e kompania hulandes BSI, representá pa sr. Piet Coevert i sr. Barry Borst a ouditá Selikor NV riba e maneho di kalidat i di medioambiente ku e kompania ta hiba. Nobo e aña akí ta e hecho ku Selikor a wòrdu sertifiká segun e último i mas resien norma di tantu kalidat komo medioambiente, ku ta 9000-2015 i 14001-2015.
E norma nobo di 2015 ta duna hopi atenshon na uniformidat, sinkronisashon i sinergia ku mester tin entre e diferente prosesonan den e organisashon. Tambe e norma nobo ta eksigí un grado haltu di kompromiso di e gerensia pa ku e maneho di kalidat i medioambiente. Otro aspekto interesante di e norma nobo ta ku e kompania mester tin tur posibel rísiko identifiká ku lo por stroba su operashon i tambe e probabilidat i impakto di esakinan.
E proseso di ISO riba su mes ta unu kaminda ta stipulá norma di prestashon, ta plania, ta ehekutá trabounan i ta midi prestashon. Durante aña ta tene momentunan di kontròl i korekshon interno i eksterno pa garantisá ku finalmente e kompania ta kumpli mas tantu posibel ku normanan internashonalmente stipulá. E sistema di ISO ta perkurá pa Selikor tin un instrumento ku ta garantisá ku tur aktividat i trabou di e kompania ta wòrdu realisá na un nivel di kalidat ku ta kumpli ku loke nos klientenan ta spera di nos i teniendo semper kuenta pa no hasi daño na nos medioambiente.
Un punto importante ku a bin dilanti durante di e ouditoria di BSI ta ku Selikor NV a bin ta traha di forma strukturá ku e meta pa mantené e kalidat di servisio haltu na nos klientenan. Asina tambe Selikor a konosé un adelanto den su prestashon. Banda di esaki BSI a tuma nota tambe ku a mehorá e kondishon di e departamentu di Garashi i di su personal supstanshalmente. Tur esaki BSI ta konsiderá komo esfuersonan hasí den kuadro di mehorashon kontinuo, ku netamente ta e loke ISO ta para p’e.
Durante di e ouditoria BSI a rekonosé ku e forma ku Selikor ta registrá su prestashon ta bon hinká den otro i ku e kompania a enkaminá e trayekto pa wòrdu sertifiká segun e norma nobo di 2015 di forma eksepshonal. Naturalmente tambe a bin dilanti durante e ouditoria algun aspekto operashonal ku mester di mas atenshon. E último akí pa garantisá ku Selikor ta sigui den e rumbo di yega mas serka di e loke su klientenan ta spera di dje.
Ku e resultado di e ouditoria akí Selikor a prueba ku di forma konsistente e kompania a bin ta kumpli ku eksigensianan di tantu ISO 9000 i ISO 14001 i ku sigur pa loke ta trata e norma nobo e kompania ta riba e bon kaminda. Konsekuentemente e kompania ta optené ámbos sertifikado segun e vershon nobo di 2015.
Pa Selikor e sertifikashon di ISO no ta algu pará riba su mes. E sertifikashon ta forma parti di e maneho integral di e kompania. Selikor ta kontentu ku e logro akí i ta gradisí komunidat pa e sosten i konfiansa brinda na Selikor durante e lunanan di aña 2017 ku ya a transkurí i ta konta riba e sosten akí den futuro.
