KOMUNIKADO DI PRENSA
No. 2017/016
Selikor NV
Fecha: 20 di òktober 2017
Tópiko: Selikor ta sera siman di medioambiente kreando kupo di trabou pa hóben desempleá
Telefon: 434-1349/Faks: 465-6964
wèpsait: www.selikor.com
Selikor ta sera siman di medioambiente kreando kupo di trabou pa hóben desempleá
Djabièrnè 20 di òktober Selikor NV a sera e siman di medioambiente di un forma hopi speshal. Durante un enkuentro ku prensa i den presensia di ministernan Camelia-Römer enkargá ku e karterea di Salubridat Públiko, Medio Ambiente i Naturalesa i Koeiman enkargá ku e Desaroyo Sosial, Labor i Bienestar, Selikor NV a formalisá e intenshon pa duna 3 hóben desempleá trabou.
Manera ta konosí Minister Camelia-Römer a proklamá siman di 16 pa 20 di òktober komo siman di medioambiente i naturalesa. Selikor NV a skohe netamente e siman akí pa duna inisio na e trayekto ku tin komo meta intensivá esfuersonan pa krea mas konsientisashon rondó di i amplia aktividatnan di resiklahe. Pa loke ta trata e parti operashonal di e trayekto Selikor NV a uní forsa ku e ministerio di SOAW. Konkretamente esaki ta enserá ku via di SOAW 3 hóben desempleá ta bini na remarke pa un funshon den Selikor den e área di trabou di resiklahe. Pues banda di duna aporte na krea un mihó medioambiente, Selikor NV ta kontribuí tambe na e forsa laboral i ku esaki na bienestar di komunidat.
Segun Wesley Kook, direktor general di Selikor NV, un di e metanan prinsipal den e maneho di e kompania ta pa duna kontenido na e responsabilidat síviko i sosial ku e kompania ta karga pa ku komunidat. E proyekto aki ta fet perfektamente den e meta akí. Minister Koeiman tambe a hiba palabra i a trese dilanti ku pa su ministerio e kolaborashon ku Selikor NV akí ta unu eksitante ya ku e ta komplementá e esfuersonan di yuda mas tantu hende ku ta posibel yega na un trabou. Minister Camelia- Römer a para ketu na e vishon ku gobièrnu tin pa ku maneho di medioambiente en general i maneho di shushi en partikular. Tambe Camelia- Römer a splika kua ta Selikor NV su ròl den e totalidat akí.
Ku e akuerdo firmá entre Selikor NV i SOAW un total di tres hóben ku ta buskando trabou lo bini na remarke pa haña eksperiensha di trabou pa un periodo di 1 aña. Na inisio di e trayekto e hóbennan lo risibí un treinen intensivo di e tareanan ku nan mester bai ehersé i tambe sera konosí ku Selikor NV. E treinen lo konsistí di un parti teorétiko i un parti práktiko i lo ta bou di enkargo di profeshonalnan ku ta laborá na Selikor mes. Despues di un aña lo evaluá prestashon di e hóbennan akí ku chèns ku nan lo por drenta den servisio di Selikor.
-riba e potrèt nos por mira xxxxxxxx-
