KOMUNIKADO DI PRENSA
No. 2017/022
Selikor NV
Fecha: 13 di desèmber 2017
Tópiko: Proyekto di resiklahe na lèntfel ta kontinuá ku mas ánimo
Telefon: 434-1349/Faks: 465-6964
wèpsait: www.selikor.com
Proyekto di resiklahe na lèntfel ta kontinuá ku mas ánimo
Apesar di e kandela ku a surgi djasabra mardugá na lèntfel Malpais, den kua a kima un área kaminda tabatin material destiná pa e proyekto di resiklahe, Selikor NV ta partisipá ku e kompania lo kontinuá ku esfuersonan i aktividatnan di resiklahe.
Djasabra último a surgi un kandela grandi na lèntfel Malpais. E kandela a afektá un área kaminda tabatin un lote di kònteiner di shushi kibrá i tambe e lote di tayer destiná pa e proyekto di resiklahe. Selikor NV ta lamentá ku habitantenan di e barionan rondó di lèntfel Malpais a sufri molèster di e kandela, sigur pasó tin indikashon fuerte ku e kandela tabata unu intenshonal. Deskonosínan lo mester a burla di e seguridat presente dor di pasa di mòndi pa yega na e área en kuestion i pega esaki na kandela.
Destrukshon di e lote di kònteiner di shushi kibrá i e lote di tayer destiná pa resiklahe ta okashoná retraso den e trayekto inisiá den luna di novèmber 2017. E trayekto tin komo meta intensivá esfuersonan pa krea mas konsientisashon rondó di i amplia aktividatnan di resiklahe. Pa e parti operashonal di e trayekto Selikor NV a uní forsa ku e ministerio di SOAW i a duna 3 hóben desempleá trabou den e área di resiklahe. E hóbennan en kuestion a haña un kontrato di 1 aña i pa komienso di luna di novèmber nan a kuminsá ku e trabounan. E kandela a pone ku e trabou ku ya e hóbennan a desplegá a bai pèrdí por parte. Apesar di esaki e hóbennan su ánimo ta haltu pa kontinuá i lo no laga nada desanimá nan.
Selikor ta kontentu ku e aktitut positivo di e hóbennan akí i lo sigui sostené nan den e esfuersonan konhunto pa logra metanan di e trayekto. Gerensia ta manda palabranan di gratitut tambe na tur instansha ku a yuda pa minimalisá daño di e kandela.
Ta bon pa bisa ku e kandela no a afektá e operashon di lèntfel Malpais, pues públiko por bishitá lèntfel sin problema di 7or di mainta pa 7or di anochi. Den fin di aña e fluho di bishitante ta mas haltu, sigur den wikènt. Na klientenan ku ke gana tempu, Selikor ta rekomendá pa bishitá lèntfel di djaluna pa djabièrnè.
