KOMUNIKADO DI PRENSA
No. 2018/06
Selikor NV
Fecha: 19 di febrüari 2018
Tópiko:Karnaval 2018 a produsí 86 mil kilo di shushi
Telefon: 434-1349/Faks: 465-6964
wèpsait: www.selikor.com
Karnaval 2018 a produsí 86 mil kilo di shushi
Aktividatnan di limpiesa di Selikor despues di e diferente marchanan di Karnaval 2018 a produsí un total di 86.050 kilo di shushi. Kompará ku aña 2017 esaki ta un bahada leve di ménos ku 1%.
Manera ta konosí pa añanan largu Selikor a bin ta duna su aporte na nos Karnaval. E aña akí no tabata eksepshon. Ku un tim di 40 persona i uzando diferente ekipo pisá a pasa limpia e ruta di Karnaval despues di kada marcha, inkluiendo marcha di Banda Bou. Pa fasilitá e trabounan di limpiesa un tim di Selikor a pasa, promé ku e marchanan, mara saku di shushi na e drangheknan pa públiko usa. A mara un total di 6.000 saku di shushi di 100 liter. Tambe meskos ku aña pasá a hasi uso di e trailer trùk impreshonante di Selikor ku a kore tras di e último vehíkulo di kada marcha pa públiko mes por a benta nan shushi den dje.
Djadumingu, 18 di febrüari, personal di Selikor a yuda tambe den e limpiesa di stènt i stelashinan trahá kantu di kaminda di personanan ku sea a laga e área shushi atras òf ku no a bin kita nan konstrukshon. Esaki a tuma lugá bou di kordinashon i supervishon di e tim di Prekario.
Un análisis mas profundo di e 86.050 kilo di shushi rekohé ta mustra ku e marchanan ku a konosé un kresementu na kantidat di shushi ta: Marcha Hubenil ku 43%, Teenerparade ku 17% i Marcha Grandi ku 39%. Di otro banda e kantidat di shushi despues di Marcha di Banda Bou a baha ku 27%, Despedida Hubenil i Despedida Gran Marcha tur dos a baha ku 9%. Limpiesa ku e tim di prekario a baha ku 21% i limpiesa e djasabra promé ku Gran Marcha tambe a baha, den e kaso akí ku 80%.
Pa Selikor e trabounan di limpiesa a kana bon i sin muchu insidente. Públiko a respondé bon tambe na e yamada pa depositá tur shushi den e sakunan di shushi na e drangheknan i pone esakinan kantu di kaminda pa Selikor por a bai kuné.
Un danki na e personal di Selikor pa e trabounan desplegá i un danki na komunidat pa karga su parti di responsabilidat, pasó t’asina ta hende.
