KOMUNIKADO DI PRENSA
No. 2018/009
Selikor NV
Fecha: 30 di febrüari 2018
Tópiko: Selikor ta start ku limpiesa di sitionan ilegal di benta shushi
Telefon: 434-1349/Faks: 465-6964
wèpsait: www.selikor.com
Selikor ta start ku limpiesa di sitionan ilegal di benta shushi
Entrante djaluna, 5 di mart, Selikor ta inisiá ku trabounan di limpiesa na dos área kaminda ta depositá shushi di forma ilegal. Ta bai eliminá e sitionan kaminda ta benta shushi di forma ilegal na Shut i Ronde Klip (e kaya ku ta kore di Free Zone, Playa Canoa bai sali na landhuis Ronde Klip).
Manera ta konosí tur aña di nobo Selikor ta kana e trayekto pa limpia e diferente áreanan kaminda suidadanonan iresponsabel ta basha shushi di forma ilegal. Lamentablemente kada bes di nobo mester konstatá ku e sitionan en kuestion, den tempu rèkort, ta bolbe wòrdu shushá. Selikor no ta kansa di enfatisá e konsekuensianan desagradabel di e fenómeno akí pa nos salubridat públiko i pa nos ekonomia turístiko.
Hopi di e áreanan akí ta áreanan alehá i for di bista i trafikashon regular di hende. Ta netamente esaki ta hasi e áreanan akí atraktivo pa turista pero alabes tambe pa esnan ku ta shusha. Shushedat na e áreanan akí ta pone ku e área en kuestion ta pèrdè su balor ekológiko i turístiko. Esaki ta pèrhudiká Kòrsou su imágen komo destinashon pa turista i no ta kontribuí na e loke nos isla ke para p’e; esta un isla dushi. Pa e motibunan akí Selikor ta aploudí e inisiativa di Minister di GMN, Suzy Camelia-Römer, pa reinstalá e X-tim di forma ku outoridatnan kompetente por aktua ku man duru kontra tur esnan ku ta hasi nan mes kulpabel na benta shushi na sitionan ku no ta destiná pa esaki.
Selikor ta hasi un apelashon na tur suidadano i tambe kompanianan pa no kore ningun rísiko ora ta deshasí di shushi. Si bo ta hasi uso di un transportadó privá, sigurá bo mes ku bo shushi ta wòrdu depositá na lèntfel Malpais òf transbordo Koraal Specht, ya ku esakinan ta e úniko sitionan legal pa hasi esaki. Ta bon pa enfatisá ku na tur momentu doño di e shushi ta keda responsabel pa su shushi, tambe ora e laga un transportadó privá bai ku esaki. Tur esnan ku no kumpli ku lei den e konteksto akí, por wòrdu pèrsiguí pa hustisia. Si bo tin un kas inhabitá òf tereno pará bashí, trata na sera esaki bon pa evitá ku bo propiedat por wòrdu usá komo sitio ilegal pa deshasí di shushi. Komo doño di e propiedat ta abo outoridatnan lo pone responsabel pa e shushedat i lo bo por wòrdu konfrontá ku gastunan mará na limpiesa di esaki.
Selikor ta ofresé masha hopi posibilidat (grátis) pa deshasí di bo shushi di forma responsabel. Pa nos por realisá un Kòrsou mas limpi, laga nos tur ban tene nos mes na lei i reglanan vigente ora nos ta atendé ku nos shushi, pasó t’asina ta hende.
