KOMUNIKADO DI PRENSA
No. 2018/017
Selikor NV
Fecha: 28 di ougùstus 2018
Tópiko:Den luna di sèptèmber Selikor lo regalá Fun Miles na Kaya di Medioambiente
Telefon: 434-1349/Faks: 465-6964
wèpsait: www.selikor.com
Den luna di sèptèmber Selikor lo regalá Fun Miles na Kaya di Medioambiente
Den luna di sèptèmber próksimo tur persona ku hasi uso di Selikor su Kaya di Medioambiente na Malpais i hiba un mínimo di 24 bòter di plèstik, di aluminium òf glas lo risibí Fun Miles. Ku e akshon akí Selikor ta insentivá tur persona ku ta kontribuí na kuida nos medioambiente via resiklahe
Na aña 2010 Selikor a hasi apertura ofisial di su Kaya di Medioambiente. E Kaya di Medioambiente ta fungi komo un sentro kaminda públiko por entregá diferente tipo di shushi den forma surtí. Gran parti di e shushinan akí lo haña e destinashon di resiklahe. E Kaya di Medioambiente ta forma parti di e maneho di shushi integral ku Selikor a bin ta hiba i ta duna kontenido na e aspekto di resiklahe komo un di e métodonan efektivo pa alargá bida di nos lèntfel. E Kaya di Medioambiente ta estilo drive through kaminda públiko por pasa ku nan vehíkulo i para na kònteinernan destiná pa diferente tipo di shushi. Kada kònteiner tin un bòrchi ku ta indiká kua tipo di shushi mester bai aden.
Pa stimulá e konsenshi di resiklahe bou di komunidat i alabes oumentá uso di e Kaya di Medioambiente Selikor lo duna un insentivo na personanan ku hasi uso di e Kaya di Medioambiente tresiendo nan shushi ku por resiklá. Ta bai premia tur persona ku duna un kontribushon na redusí e kantidat di shushi ku lo resultá riba nos lèntfel. Meta di e insentivo tambe ta pa yuda redusí e kantidat di shushi visual riba nos isla. Pa e motibu akí lo bai konsentrá riba e siguiente tiponan di shushi: bòter di glas, bòter di plèstik i bleki di aluminio. Otro meta ku ke logra ku e kampaña akí ta pa mustra komunidat ku nan shushi tin balor.
E insentivo ku lo bai duna na Kaya di Medioambiente ta bai ta den forma di Fun Miles i ta konta pa luna di sèptèmber ku ta luna di limpiesa. Tur persona ku hasi uso di e Kaya di Medioambiente, pa bin depositá nan bòter di glas, bòter di plèstik i bleki di aluminio, lo risibí 25 miles pa dia pa bishita na momentu ku nan entregá un mínimo di 24 item.
Ku e kampaña akí Selikor ta spera di por sigui motivá komunidat pa atendé ku shushi di forma responsabel i reforsá e maneho di resiklahe ku lo mester redundá den un bida mas largu pa nos lèntfel.
Banda di e kampaña akí Selikor tambe ta bai partisipá na e World Clean Up Day na Kòrsou, riba 15 di sèptèmber. E inisiativa pa ku partisipashon di Kòrsou na World Clean Up Day ta un kontribushon di ministerio di SOAW i GMN i diferente fundashon i kompania, entre otro Curaçao Cares, Curaçao Clean Up, Clean Caribbean Coalition i Green Force. Gobièrnu tambe ta sostené e akshon akí i ta papia pa su mes ku Selikor no por keda afó.
Partisipantenan ku mèldu na e organisashon di World Clean Up Day Curaçao ta bini na remarke pa depositá, e shushi ku nan kolektá riba e djasabra 15 di sèptèmber, di forma grátis na lèntfel Malpais. Naturalmente lo registrá na entrada di lèntfel tur vehíkulo ku drenta komo parti di e prosedura normal ku Selikor mester kumpli kuné. Lo bai kordiná e trabounan di forma ku lo no opstakulisá pasashi pa drenta lèntfel. Pa mas informashon pa ku e parti akí por tuma kontakto ku organisadónan via worldcleanupdaycuracao@gmail.com.
Un apelashon ta bai na komunidat kompletu pa inskribí i partisipá na e dia akí.
