KOMUNIKADO DI PRENSA
No. 2018/022
Selikor NV
Fecha: 18 di òktober 2018
Tópiko: Gladys van Dal Mc Kenzie Award a bira Realidat
Telefon: 434-1349/Faks: 465-6964
wèpsait: www.selikor.com
Gladys van Dal Mc Kenzie Award a bira Realidat
Riba su fecha natal, 18 di òktober, Selikor NV a duna rekonosementu póstumo na un baluarte riba e tereno di medioambiente sra. Gladys van Dal-Mc Kenzie. Sala di ouditorio di Selikor tabata esenario pa entrega di e promé edishon di e Gladys van Dal-Mc Kenzie Award. Durante un anochi hopi inspirativo i alabes emoshonal, famia i konosínan di sra. Gladys van Dal por a skucha di esnan presente tur loke nan ser kerí a hasi pa Kòrsou tantu riba tereno sosial komo riba tereno di medioambiente.
E di tres siman di luna di òktober tradishonalmente ta selebrá siman di Medioambente aki na Kòrsou. Selikor e aña akí kier a selebrá e siman di medioambiente di un forma sereno, úniko i alabes duradero i a bini na e idea pa duna honor na sra. Gladys van Dal, ku tabata un pilar den e lucha pa un medioambiente duradero. A krea un premio ku ta karga su nòmber ku e meta pa stimulá i motivá organisashonnan pa tene kuenta ku perservashon di nos medioambiente den nan operashon. Pa e promé edishon di e premio a skohe 3 organisashon ku a demostrá di ta riba un bon kaminda pa loke ta trata aspektonan ku e premio ta para p’e. E komishon di selekshon a skohe Dynaf Caribbean, Mondi Lodge i The Traingle komo organisashonnan pa risibí e promé Gladys van Dal Mc Kenzie Award.
Durante di e anochi e públiko presente por a skucha tambe diferente oradó presentá nan pensamentu tokante di e tema di anochi ku tabata: Balansá i harmonisá maneho di turismo i medioambiente. Banda di direktor general di Selikor sr. Wesley Kook, a hiba palabra tambe sra. Alba Martijn konsehero di Ministerio di Salubridat, Medioambiente i Naturalesa. Minister presidènt sr. Eugenne Ruggenaath tambe a dirigí su mes na presentenan i asina tambe representante di e programa di Medioambiente di Nashonnan Uní pa e área di Caribe, sr. Vincent Sweeney. Huntu ku sr. Dino Daal di Ofisina di Turismo tur esnan menshoná a diskutí riba e tema di anochi den un panel.
Selikor ta sumamente honrá di por a tene e anochi di seremonia pa manera e mes tabata yama su mes: e madrina di Selikor. Pa pròksimo aña komunidat lo bai tende mas di e prestigioso premio akí dediká na un gran yu di Kòrsou.
