KOMUNIKADO DI PRENSA
No. 2018/023
Selikor NV
Fecha: 26 di òktober 2018
Tópiko: Selikor ta pasa ouditoria di ISO ku éksito
Telefon: 434-1349/Faks: 465-6964
wèpsait: www.selikor.com
Selikor ta pasa ouditoria di ISO ku éksito
Durante e siman di 22 pa 26 di òktober e kompania hulandes BSI, representá pa sr. Barry Borst, a ouditá Selikor NV riba su maneho di kalidat i medioambiente segun e último i mas resien normanan ISO 9000-2015 i 14001-2015. Selikor un biaha mas a pasa e kòntròl akí di forma eksitoso.
For di aña 2001 Selikor ta pasa anualmente di forma positivo dor di e trayekto pa risibí/mantené e sertifikashon di kalidat, ISO 9000. Na aña 2005 a agregá e trayekto di ISO di medioambiente, ISO 14001, tambe aserka. Pa ku esaki tambe Selikor a logra tur aña di nobo di pasa e ouditoria pa sertifikashon ku éksito.
Risibí e sertifikashon di ISO ta enserá ku e kompania sertifiká tin su normanan di prestashon bon definí, ta plania, ehekutá, kontrolá, midi resultado di su propio prestashon i kaminda esaki ta nesesario ta adaptá i koregí. E meta final ta ku e kompania mester kumpli mas tantu posibel ku normanan internashonal pa ku e sertifikado en kuestion. Representante di e kompania BSI a konstatá durante di nan ouditoria pa 2018 ku e struktura di operá akí ta kompletamente internalisá den Selikor. Nan tabatin elogio pa e forma transparente i aksesibel kon Selikor ta dokumentá e struktura akí.
Gerensia i personal di Selikor ta kontentu ku a logra mantené ámbos sertifikado apesar di e retonan ku e kompania mester a enfrentá den 2018. Selikor ta sigui traha di forma konsistente pa kumpli ku eksigensianan di ISO 9000 i ISO 14001. Un danki ta bai na komunidat den su totalidat pa e sosten i konfiansa brinda na Selikor durante aña 2018.
