KOMUNIKADO DI PRENSA
No. 2019/03
Selikor NV
Fecha: 8 di mart 2019
Tópiko: Selikor ta inisiá ku trabounan di limpiesa den bario
Telefon: 434-1349/Faks: 465-6964
wèpsait: www.selikor.com
Selikor ta inisiá ku trabounan di limpiesa den bario
Awor ku e trabounan di limpiesa enkonekshon ku e temporada di karnaval ta tras di lomba, Selikor lo inisiá ku trabounan di limpiesa riba kamindanan prinsipal i den barionan. Lo bai repartí e trabounan di limpiesa den 4 fase pa kubri Kòrsou kompleto. Habitantenan di e diferente barionan lo bai ripará e trabounan den e barionan ku ta na turno.
Entrante luna di mart Selikor lo hasi limpiesa den mas ku 60 bario, repartí for di Banda Abou te ku Souax i parti pariba di Kòrsou kuminsando for di bario di Sta Rosa te ku Seru Machu. E trabounan di limpiesa lo wòrdu ehersé dor di algun kontratista i organisashonnan di Bario.
Trabounan ta enserá ku lo kòrta yerba i rama di palu te na kurá di kas, lo bari tur tera riba kaminda públiko, rant di kaminda i na krusadanan prinsipal. Tambe tur rama di palu ku ta tira riba kaminda públiko, ku ta kologá bou di 4 meter di haltura, lo keda kòrtá. Banda di esakinan lo piki tur shushi visual manera, papel, karton, saku di plèstik, bleki, bòter i tur otro material ku no ta pertenesé kantu di kaminda. Pa loke ta trata áreanan manera bòrchi di bus, esakinan tambe lo risibí e atenshon nesesario pa e áreanan akí tambe keda limpi.
Selikor ta pidi tur habitante pa duna espasio na e tim di limpiesa pa nan por hasi nan trabou di forma optimal. Despues ku e trabounan di limpiesa finalisá e apelshon ta pa kada habitante yuda mantené e área rondó di nan kas limpi. Habitantenan mester realisá e importansha i nesesidat pa nan mes yuda mantené nan bario limpi. Esaki ta parti di nos kada un su responsabilidat síviko pa ku nos pais. Si nos kada un hasi esaki nos por garantisá un Kòrsou limpi, manera nos ke. Selikor ta konta ku un i tur su kolaborashon pa di e forma akí yuda mantené Kòrsou liber di shushi. Pasó t’asina ta hende.
