KOMUNIKADO DI PRENSA
No. 2019/004
Selikor NV
Fecha: 14 di mart 2019
Tópiko: Karnaval 2019 a produsí 97.243 kilo di shushi
Telefon: 434-1349/Faks: 465-6964
wèpsait: www.selikor.com
Karnaval 2019 a produsí 97.243 kilo di shushi
Selebrashon di Karnaval 2019 ta tras di lomba i Selikor ta tuma e oportunidat akí pa gradisí tantu e gruponan di persona ku a desfilá den e diferente marchanan komo e públiko karnavalista pa nan bon koperashon pa ku e aspekto di limpiesa. Esaki a fasilitá e trabounan di limpiesa durante e marchanan di karnaval ku a produsi 97.243 kilo di shushi.
Manera ta tradishon, despues di tur marcha Selikor tin na su enkargo pa hasi e kayanan limpi bèk. Tur aña di nobo Selikor ta pidi koperashon di tur karnavalista pa sali ku saku di shushi for di kas pa tira tur shushi aden i pone esaki kantu di kaya, miéntras ku Selikor ta sòru pa sobrá.
Uzo di saku di shushi
Meskos ku añanan anterior, e aña akí tambe Selikor a mara sakunan na e drangheknan riba ruta di karnaval. Grupo di hóbennan bou di guia di personal di Selikor a sòru pa distribuí tur e sakunan algun ora promé ku salida di e sinku diferente marchanan. Ku esaki Selikor ke stimulá nos pueblo pa kada un di nos ta responsabel pa yuda mantené nos isla limpi. Selikor ta satisfecho na momentu di rekohé e sakunan yen di shushi kantu di kaminda, pues públiko a hasi bon uzo di e sakunan durante e marchanan.
Kantidat di shushi ku a rekohé
E aña akí un biaha mas un grupo grandi di trahadónan di Selikor despues di tur marcha a subi kaya pa hasi e trabou di limpiesa di henter e ruta di karnaval.
E kantidat di 97.243 kilo shushi ku a keda rekohé, repartí bou di e diferente marchanan ta: karnaval di mucha 11.160 kilo, teener parade 11.670 kilo, karnaval di banda bou 4.500 kilo, zongo 1.060 kilo, karnaval di hende grandi 27.468 kilo, despedida di mucha 8.932 kilo i finalmente despedida di grandi 25.273 kilo. Na final di e temporada di karnaval, despues ku a kita tur stelage kantu di e ruta, a rekohé un kantidat di 7.180 kilo di shushi na materialnan ku entre otro a usa pa traha stelage. Pa kompará ku aña 2018 sifranan ta indiká ku tabatin un subida di 13% (2018 = 86.050 kilo) pa loke ta e kantidat di shushi kolektá.
Selikor por mira atras riba un temporada di karnaval 2019 eksitoso i ta gradesí su empleadonan pa e bon trabou desplegá. Nos ta felisitá e públiko karnavalista pa nan komportashon i nos ta sigui konta riba esaki durante henter aña...Pasó t’asina ta hende.
