KOMUNIKADO DI PRENSA
No. 2019/014
Selikor NV
Fecha: 11 di September 2019
Tópiko: Kontròl intensivo pa yuda kombatí sitionan ku ta dùmp shushi ilegal
Telefon: 434-1349/Faks: 465-6964
wèpsait: www.selikor.com
Kontròl intensivo pa yuda kombatí sitionan ku ta dùmp shushi ilegal
Últimamente nos a bin ta tende, den medionan di komunikashon, hopi di ‘ Dam Pretu’. E área aki ta keda parti pariba di Kòrsou den kual pa un tempu kaba malechornan ta hasi nan mes responsabel di deshasí di shushi ilegal. Pa mas ku ta limpia e área riba un base regular i parti but na esnan ku bin topa, tòg nos ta sigui.
Pa sigui hasi lo máksimo pa stòp ku e akto aki, Selikor huntu ku X-Tim i tambe tim di polis den área di pariba ku ta enkargá ku medioambiente lo bai traha den estrecho kolaborashon asina inisiá un kontròl intensivo den área di pariba. Ku esaki Selikor, den su afan pa sigui stimulá komunidat pa deshasí di shushi di un forma responsabel, lo bai traha riba diferente forma di insentivo pa krea mas konsientisashon den komunidat pa ku e aspekto di limpiesa. Ademas lo bai inisiá ku kontròl den e luna di sèptèmber i sigui ku kontròlnan intenso huntu ku X-Tim i polis di wijkteam Montaña.
E kontròl ta enserá ku si sea polis òf un miembro di X-Tim topa ku un transportadó di shushi, esaki na su lugá mester por prueba orígen di e shushi. E por hasi esaki pa medio di su propio komprobante o sea usando e komprobante ku tur transportadó di shushi por disponé di dje serka Selikor. Ku e formulario aki e transportadó por mustra orígen di e shushi i tambe doño di e shushi ta deklará ku e ta para responsabel pa e gastunan mará na deshasí di su shushi na Lèntfel òf Transbordo di shushi na Koraal Specht. E formulario mester ta kompleto i korekto yená i mester bai akompañá ku kopia di identifikashon di e doño di shushi.
Den kaso ku e transportadó di shushi no tin e formulario huntu kuné i ningun otro komprobante di orígen di e shushi, personal di X-Tim òf polis mes lo fasilitá e formulario i lo duna instrukshon pa yena esaki i firma na mes momento. Finalmente lo kontrolá si enbèrdat e shushi konserní a yega na Lèntfel Malpais òf Transbordo di shushi na Koraal Specht.
Un apelashon ta bai na komunidat kompleto pa hinka transporte di bo shushi den man di transportadónan responsabel ku lo bai depositá shushi na e úniko sitionan legal pa hasi esaki ku ta na Lèntfel Malpais òf Transbordo di shushi na Koraal Specht. Despues ku e transportadó kaba di depositá bo shushi pidié pa e komprobante di esaki.
Si akaso bo topa ku un transportadó di shushi den direkshon kaminda tin áreanan bandoná, mèldu mesora na X-Tim #0800-0877 ora di ofisina, 917 i tambe por mail na xteam@gmail.com. Di e forma aki nos tur por aportá na un Kòrsou limpi.
