KOMUNIKADO DI PRENSA
No. 2019/015

 

 

Selikor NV
Fecha: 12 di sèptèmber 2019
Tópiko: Sèptèmber, luna di limpiesa
Telefon: 434-1349/Faks: 465-6964
wèpsait: www.selikor.com

 

Sèptèmber, luna di limpiesa

 

Sèptèmber ta e luna den kual hopi di nos ta para ketu riba e importansia di limpiesa. Durante e luna di sèptèmber Selikor tambe ta pone hopi énfasis riba tur aspekto ku tin di haber ku limpiesa. Durante henter e luna akí Selikor ta konsentrá, banda di e tareanan prinsipal, riba aktividatnan di konsientisashon i ta sigui motivá komunidat pa atendé ku shushi di forma responsabel. Durante henter e luna akí tambe Selikor ta sigui duna un aporte mas intensivo na limpiesa di nos barionan dor di motivá kada habitante pa nan mes kontribuí na limpiesa di nan kas i nan bario.

 

Un proyekto ku sigur ta bini bèk durante e luna di limpiesa ta e Kaya di Medioambiente Mobil. Selikor lo bai ta visibel den algun bario i manera kustumber lo tin baki grandi i tambe kònteinernan kaminda tur habitante di e barionan konserní i tambe otro áreanan den serkania por bin depositá nan shushi gròf. Ora ta trata di shushi gròf mester pensa riba por ehèmpel wasmashin bieu, televishon, stof, muebel bieu etc. Shushi gròf no ta shushi di kurá ni shushi di konstrukshon.

Tin oportunidat pa habitantenan por trese nan shushi separá i pa kada habitante ku trese un mínimo di 24 item di sea bòter di glas, bòter di plèstik i bleki di aluminio, lo risibí un premio. E aktividat ta kuminsá 10or di mainta i kaba 4or di atardi.

Pa e fin di siman akí, djasabra 14 di sèptèmber e tim di Selikor ku Kaya di Medioambiente Mobil lo bai ta na Transbordo di Shushi Koraal Specht. E siguiente djasabra, dia 21 di sèptèmber e bario di Montaña i besindario lo ta na turno i lo ta riba e plenchi pegá ku pòmp di gasolin Vanddis. Por último, riba djasabra 28 di sèptèmber, Kaya di Medioambiente Mobil lo bai ta den e bario di Tera Kòrá banda di misa katóliko. E intenshon ta pa e barionan mes ta envolví, tur hende mester limpia nan propio kurá i besindario i asina hiba nan shushi gròf kaminda e Kaya di Medioambiente Mobil ta stashoná.

Selikor ta rekordá komunidat ku pa shushi gròf Selikor ta ofresé un bes pa luna servisio grátis. Un bes pa siman Selikor ta pasa rekohé shushi di kas den tur bario i si e habitante ta deseá esaki e mes tambe por pasa na Transbordo Koraal Specht òf na e kompleho na Malpais pa deshasí di su shushi di kas i shushi di kurá. Pa shushi di konstrukshon Selikor ta brinda e posibilidat pa trese esaki grátis na Malpais. Na Kaya di Medioambiente na Malpais por pasa i deshasí grátis di diferente tipo di shushi ku por resiklá. Esaki ta nifiká ku no tin niun motibu pa benta shushi kaminda esaki no ta pèrmití pa lei.

Selikor ta sigui apelá na tur nos habitantenan pa yuda mantené nan bario limpi. Si nos ta konsiderá ku e pais akí ta di nos, nos tin e responsabilidat patriótiko i síviko pa mantené limpi.