KOMUNIKADO DI PRENSA
No. 2019/016
Selikor NV
Fecha: 20 di sèptèmber 2019
Tópiko: Selikor aktivo pa djòin World Clean Up Day na Kòrsou
Telefon: 434-1349/Faks: 465-6964
wèpsait: www.selikor.com
Selikor aktivo pa djòin World Clean Up Day na Kòrsou
Pa djasabra awor, 21 di sèptèmber, Selikor lo ta visibel ku
Kaya di Medioambiente Mobil.
Selikor lo partisipá aktivamente na e World Clean Up Day na Kòrsou. E tim di Selikor ku Kaya di Medioambiente Mobil lo bai ta den e bario di Montaña i besindario riba e plenchi pegá ku pòmp di gasolin Vanddis, for di 10or te ku 4or. Na e sitio akí lo tin baki grandi i tambe kònteinernan kaminda tur habitante di e barionan alrededor i tambe otro áreanan den serkania por bin depositá nan shushi gròf.
Tambe tin oportunidat pa habitantenan por trese nan shushi separá i pa kada habitante ku trese un mínimo di 24 item di sea bòter di glas, bòter di plèstik i bleki di aluminio, lo risibí un premio. E aktividat ta kuminsá 10or di mainta i kaba 4or di atardi.
No tin motibu pa warda shushi te na último momentu pa deshasí di dje. Tampoko no ta na nodi pa spar shushi rondó di nos kas. Selikor ta duna diferente alternativa pa deshasí di nos shushinan durante henter aña. E proyekto di Kaya di Medioambiente Mobil ta otro forma pa yega mas serka den bario i duna oportunidat mas na kada habitante pa deshasí di nan shushi di un forma responsabel.
Pa loke ta trata e akshonnan di limpiesa den kuadro di World Clean Up Day Curaçao tur hende ku a registrá via di e organisashon ta bini na remarke pa depositá, e shushi ku nan kolektá riba djasabra 21 di sèptèmber, di forma grátis na lèntfel Malpais. Naturalmente lo registrá na entrada di lèntfel tur vehíkulo ku drenta komo parti di e prosedura normal ku Selikor mester kumpli kuné. Lo bai kordiná e trabounan di forma ku lo no opstakulisá pasashi pa drenta lèntfel.
For di akí un danki na komunidat i na kada suidadano ku a inskribí pa partisipá aktivamente na e akshonnan di limpiesa di World Clean Up Day Curaçao. Bin topa ku nos Kaya di Medioambiente Mobil riba e plenchi pegá ku pòmp di gasolin Vanddis na Montaña, for di 10or di mainta te ku 4or di atardi.
Si nos kada un duna un man pa nos isla ta limpi nos ta yuda tambe halsa kalidat di bida den bario. Un Kòrsou Limpi i Bunita pa nos mes, ta huntu so nos por logra esaki.
Abo i Selikor, huntu nos ta tene e isl’akí limpi.
