KOMUNIKADO DI PRENSA
No. 2019/017
Selikor NV
Fecha: 27 di sèptèmber 2019
Tópiko: Selikor ta pidi pa ofresé shushi di kas den kònteiner di forma korekto
Telefon: 434-1349/Faks: 465-6964
wèpsait: www.selikor.com
Selikor ta pidi pa ofresé shushi di kas den kònteiner di forma korekto
Pa sigui optimalisá e servisio di rekohé shushi di kas, un bes pa siman, na tur bibienda rònt Kòrsou, Selikor NV ta hasi un apelashon nan tur kas di famia pa kumpli ku e kondishonnan mará na uso di e servisio akí. Na aña 1996, ora a introdusí e kònteiner di shushi pa fasilitá e rekohementu di shushi di kas, a stipulá algun regla básiko pa ku uso di e kònteiner di shushi (kliko). Segun añanan a pasa nos a bin nota ku, den práktika, e reglanan akí kisas a bai pèrdí. Pa medio di e komunikado akí Selikor kier rekordá komunidat riba e reglanan en kuestion.
Un di e reglanan prinsipal ta ku ta solamente shushi di kas por bai den kliko, basta e ta fit den esaki. Pues no ta aseptá shushi di kurá den e kònteiner. E kliko su tapa mester por sera, pues no por hinka di mas shushi den e kònteiner.
Tur otro tipo di shushi di kas ku no ta bai den un kliko por entregá na momentu ku Selikor ta rekoh’é shushi gròf. Pa servisio di shushi gròf, Selikor ta pasa un biaha pa luna den tur bario i rekohé esaki grátis segun un skema definí den kual kada bario tur luna ta yena na turno. Pa loke ta trata shushi di kurá, Selikor ta ofres’é servisio akí kontra di pago.
Otro regla importante ta ku e peso total di e kliko no por surpasá 70 kilo. Esaki ta importante pa e personal di Selikor por manehá e Kliko i peg’é na un trùk i pa e trùk por bòltu esaki basha e shushi den e baki patras. Banda di esaki no ta bai ku shushi ni riba ni banda di e kliko.
Por pone solamente kònteiner partí pa i registrá na Selikor pafó di kurá pa risibí e servisio ya ku e personal no ta outorisá pa bai ku otro tipo di kònteiner. Orario ku mester pone e kliko pafó di kurá ta promé ku 7or di mainta i solamente riba e dia ku Selikor ta pasa den e bario konserní pa rekohé shushi di kas. Nos trùknan ta inisiá na ruta for di 7or di mainta. Ta bini aserka ku kada kas ta responsabel pa limpiesa i mantenshon di e kliko na e adrès korespondiente.
Ku e rekordatorio akí Selikor ta pidi koperashon di komunidat pa tene kuenta i kumpli ku e kondishonnan. E koperashon akí ta nesesario pa nos por kuida nos ekiponan i tambe nos personal i pa por sigui brinda komunidat e servisio di forma konsistente i konfiabel.
