KOMUNIKADO DI PRENSA
No. 2019/022
Selikor NV
Fecha: 21 di novèmber 2019
Tópiko: Selikor ta traha oranan èkstra debí na kantidat grandi di shushi gròf
Telefon: 434-1349/Faks: 465-6964
wèpsait: www.selikor.com
Selikor ta traha oranan èkstra debí na kantidat grandi di shushi gròf
Selikor NV ta informá ku, debí na e kantidat grandi di shushi gròf ku habitantenan ta ofresé den fin di aña, lo bai traha oranan èkstra den e wikènt benidero. Apesar ku Selikor ta pasa henter aña den barionan pa rekohé shushi gròf, ta konstatá ku e kantidat di shushi ku ta topa den e último dos lunan di aña ta surpasá e promedio.
Pa aliviá e situashon i kumpli mas tantu posibel ku e skema di shushi gròf, ta bai trese algun adaptashon den e aspekto opershonal di e servisio en kuestion. Banda di traha oranan èkstra riba djasabra i djadumingu tambe lo bai hasi uso di Selikor su semi-trailer ku tin un kapasidat muchu mas grandi. Lo bai reforsá e tim di trahadó tambe ku mas persona. E trùknan grèper, ku ta usa normalmente pa rekohé shushi gròf, tambe lo ta riba trabou pa eliminá e retrasonan mas tantu posibel.
Riba djasabra i djadumingu nos lo ta presente den barionan di zona 3. Prinsipalmente nos lo pasa den barionan di Brievengat, Bonam i parsialmente Kirindongo Abou. Pa mas detaye di kada zona ku indikashon di bario, por wak e skema publiká riba nos página di facebook òf subi nos websait www.selikor.com.
Habitantenan ku tuma nota ku Selikor a pasa den nan bario pero no a bai ku nan shushi gròf, ku nan a pone pafó promé ku Selikor a pasa, por tuma kontakto ku nos departamentu di Servisio na Kliente na 434-1300.
Gerensia ta pidi su diskulpa pa eventual inkonbeniensia ku eventual retrasonan por trese kuné i ta pidi su klientenan indulgensia i komprenshon.
