KOMUNIKADO DI PRENSA
No. 2020/008
Selikor NV
Fecha: 19 di òktober 2020
Tópiko: Selikor ta inisiá kampaña intensivo pa rekohé karkacha di outo
wèpsait: www.selikor.com
Selikor ta inisiá kampaña intensivo pa rekohé karkacha di outo
Den kuadro di siman di medioambiente, Selikor a inisiá un kampaña pa rekohé karkacha di outo. E kampaña akí lo bira unu intensivo den estrecho koperashon di Unidat di Bario. E intenshon ta pa aktivá habitantenan mas tantu posibel pa deshasí di nan outo bieu.
Últimamente nos a bin ta ripara ku e kantidat di outo bieu, pará dilanti di kas ta oumentá. Den hopi kaso e outo aki tin un balor emoshonal pa e doño, ku no ke deshasí di dje. Di otro banda e outo bieu aki ta forma un opstákulo pa vianan públiko i ta trese shushedat ku por tin konsekuensia pa nos salubridat.
Nos a parti Kòrsou den zona pa kanalisá i strukturá e rekohementu di e outo bieu. Lo kuminsá den área di Koraal Specht i bisindario. Habitantenan por pasa durante dia na e Sentro di bario Koraal Specht na Kaya Lando 38 di djaluna pa djabièrnè for di 8or di mainta te ku 3.30 di atardi, asina registrá i firma un formulario den kual nan ta outorisá Selikor pa laga buska e karkacha. Entretantu a tuma kontakto ku e personanan ku ya kaba a yena un petishon pa Selikor pasa rekohé outo bieu.
Pa stimulá nos habitantenan pa deshasí di nan outo bieu, Selikor lo bai duna insentivo na kada persona ku bin registrá. Despues ku Selikor laga rekohé e outo bieu for di e sitio e doño por bin reklamá un kliko agrario pa planta huntu ku un saku di vitamina pa mata. Tur esaki Selikor ta hasi pa sigui stimulá plantashon ku fin pa nos propio uso.
Pa deshasí di outo bieu ta fásil. E doño di e vehíkulo mester djis yena i firma un formulario. Por pasa personalmente na nos filial na Parera òf por manda nos un mail na info@selikor.com, kompañá ku algun dokumento/informashon: kopia di karchi di kùr di e vehíkulo, ID bálido (di e persona ku su nòmber ta aparesé riba e karchi di kùr),potrèt di e vehíkulo ku mester deshasí di dje, i number di telefòn. Den kaso ku ta otro persona ta hasi e petishon na nòmber di e doño di e vehíkulo, Selikor ta pidi un karta di apoderashon den kual e doño di e vehíkulo ta outorisá e persona pa yena e petishon.
E kampana pa intensivá rekohementu di karchacha lo kontinuá te ku fin di aña 2020.
