KOMUNIKADO DI PRENSA
No. 2022/003
Selikor NV
Fecha: 3 di yüni 2022
Tópiko: Selikor NV huntu ku ministerio di GMN ta start trayekto “Ban limpia Kòrsou”
Telefon: 434-1349/Faks: 465-6964
wèpsait: www.selikor.com
Selikor NV huntu ku ministerio di GMN ta start trayekto “Ban limpia Kòrsou”
Inisiando e siman di 6 di yüni Selikor, den estrecho kolaborashon ku ministerio di GMN, ta start ku un limpiesa integral di Kòrsou. A skohe pa start e aktividatnan di limpiesa nèt despues di dia di Medioambiente (5 di yüni), ku e aña akí ta hiba e tema “Only one Earth”, enfokando riba un transformashon i kambio den maneho pa yega na un bibá mas limpi, bèrdè i duradero den harmonia ku naturalesa.
Lo inisiá ku trabounan di limpiesa den e diferente barionan i tambe riba kareteranan prinsipal. Banda di eliminá tur shushi visual riba vianan públiko, manera ta usual, lo kita tur palu i ramanan tambe ku ta stroba visibilidat den tráfiko. Huntu ku ministerio di VVRP lo kordiná e limpiesa di roinan i tambe di playanan.
Den tur e trayekto akí ta papia pa su mes ku kolaborashon di komunidat ta sumamente importante. Pa stimulá e koperashon akí aun mas, Selikor lo bai ofresé servisionan èkstra na komunidat den forma di rekohementu di shushi gròf dos bes pa luna na lugá di un bes. Tur esaki lo sosodé gratuitamente. Tambe lo subi e kantidat di shushi ku suidadanonan por entregá grátis na lèntfel. Awor kada suidadano ku ta disponé di un vehíkulo por depositá 2 mil kilo di shushi grátis pa aña na lugá di mil.
Selikor ta konta riba e yudansa di komunidat pa huntu enkaminá e trayekto di “Ban Limpia Kòrsou” di forma eksitoso i responsabel
