KOMUNIKADO DI PRENSA
No. 2024/012
Selikor NV
Fecha: 12 di yüli 2024
Tópiko: Selikor lo kontinuá ku trabounan di limpiesa riba kareteranan prinsipal i den diferente bario
Telefon: 434-1349/Faks: 465-6964
wèpsait: www.selikor.com
Selikor lo kontinuá ku trabounan di limpiesa riba kareteranan prinsipal i den diferente bario
Próksimamente Selikor lo kontinuá ku trabounan di limpiesa riba kareteranan prinsipal i tambe den e diferente barionan. Pa loke ta trata limpiesa di kareteranan prinsipal esaki ta trabounan ku ta tuma lugá durante henter aña i den barionan esaki ta tuma lugá un bes pa aña.
Manera ta usual Selikor huntu ku Ministerio di GMN a plania i organisá pa e trabounan di limpiesa por tuma lugá. Pa mayoria di e trabounan di limpiesa Selikor ta hasi uso di kontratista òf fundashonnan di bario. E barionan ku ta na turno den fase 1, ta parti pariba di Kòrsou kuminsando for di bario di Sta. Rosa te ku Seru Machu kual ta enserá 29 bario i 46 parsela. Durashon di e trabounan di limpiesa lo ta 3 luna.
Limpiesa di kareteranan prinsipal i den barionan ta sosodé ku 65 organisashon di kua 40 kontratista i 25 fundashon di bario. Esaki ta nifiká un promedio di 390 persona lo tin trabou pa e temporada ku ta bai tin limpiesa di e áreanan indiká.
Durante e trabounan di limpiesa ta papia pa su mes ku kolaborashon di komunidat ta sumamente importante. Selikor ta konta riba koperashon di outomobilistanan pa tene kuenta ku trahadónan ku ta laborando kantu di kaminda i baha velosidat den áreanan den kua e trabounan ta tumando lugá.
