KOMUNIKADO DI PRENSA
No. 2024/017
Selikor NV
Fecha: 14 di òktòber 2024
Tópiko: Kantidat grandi di shushi a drenta lènfel Malpais durante luna di sèptèmberobo
Telefon: 434-1349/Faks: 465-6964
wèpsait: www.selikor.com
Kantidat grandi di shushi a drenta lènfel Malpais durante luna di sèptèmber
Despues ku Minisiterio di Salubridat, Medioambiente i Naturalesa, a anunsiá ku por depositá shushi grátis na Malpais, lèntfel a risibí den luna di sèptèmber 32.000.000 kilo di shushi. Esaki ta un subida supstansial mas ku 200% kompará ku aña 2023 den mesun temporada. (2023: 8.702.527)
Manera ta konosí Konseho di Minister a bai di akuerdo ku proposishon di Minisiterio di Salubridat, Medioambiente i Naturalesa, pa den forma di un proyekto piloto di 2 luna, brinda e oportunidat na públiko pa depositá nan shushi grátis na tantu lèntfel Malpais i transbordo Koraal Specht.
E desishon akí a trese kuné un subida konsiderabel den e kantidat di shushi ku a drenta lèntfel. E subida akí ta ilustrá e importansia pa mas tantu posibel entregá e shushi di forma separá di forma ku e gastunan pa Minisiterio di Salubridat, Medioambiente i Naturalesa por ta ménos i ménos shushi ta resultá riba lèntfel kual ta redusí aun mas e kapasidat máksimo di lèntfel. Aki ta referí primordialmente na shushi di konstrukshon. Ta papia pa su mes ku shushi di konstrukshon ta pisa hopi i e gastunan pa prosesá esaki di forma separá, ta kuantioso. Banda di esaki e ta tuma hopi espasio riba tereno di lèntfel i ta pone ku e kapasidat di lèntfel ta disminuí.
Selikor NV ta rekordá tur usuario di lèntfel i transbordo ku tur otro kondishon pa por depositá shushi ta keda vigente. E usuario mester por identifiká su mes ku un indentifikashon bálido i e vehíkulo mester disponé di un karchi di kùr bálido. Na transbordo Koraal Specht por depositá te un máksimo di 2m³ di shushi pa vehíkulo, esakinan mester ta bon paketá na bulto, den kaha òf saku. Pa hasi uso di tur otro servisio e usuario mester akudí na lèntfel Malpais pa deshasí di su shushi. Orarionan di servisio na lèntfel Malpais ta di djaluna pa djasabra di 7or di mainta pa 7or di anochi i djadumingu di 7or di mainta pa 3or di tardi. Orario di transbordo Koraal Specht ta di djaluna pa djadumingu di 8or di mainta pa 4or di atardi. E orarionan akí ta bálido te ku próksimo aviso.
